Maxwell-Gleichungen

D Maxwell-Gliichige beschriibe d Fenomeen vom Elektromagnetismus und sin e wichdige Däil vom modärne füsikalische Wältbild.

D Gliichige beschriibe, wie elektrischi und magnetischi Fälder underenander und mit elektrische Laadige und elektrischem Stroom under Randbedingige, wo gee sin, zämmehänge. Zämme mit dr Lorentzchraft erklääre si alli Fenomeen vo dr klassische Elektrodynamik. Si bilde doorum au die theoretischi Grundlaag vo dr Optik und dr Elektrotechnik. Dr Naame vo de Gliichige chunnt vom schottische Füsiker James Clerk Maxwell, wo sä vo 1861 bis 1864 formuliert het. Er het drbii d Durchfluetigsgsetz und s Gsetz vom Gauss mit em Indukzioonsgsetz kombiniert und au no dr Verschiebigsstroom iigfüert, zum d Kontinuidäätsgliichig nid z verletze.

D Maxwell-Gliichige si e speziells Süsteem vo lineare parzielle Differenzialgliichige vo dr erste Ornig. Mä cha sä au in ere integrale, ere differenzialgeometrische und ere kovariante Form daarstelle.